Joh 14 | YML | STEP | Wata Iesu i vo, Kebu nuafoumi i na vevigaga, 'wa na vetumagana Yaubada 'waineye wata yau 'waikuye.

John 14

Iesu yada 'eda Tamada 'waineye.

1 Wata Iesu i vo, Kebu nuafoumi i na vevigaga, 'wa na vetumagana Yaubada 'waineye wata yau 'waikuye. 2 'Awalawanina 'waineye Tamaku i miamiaga, vanuga fuedi i tovotovoi. Yau a na nago yami 'eba mia a na 'i'idewadewadi. I na 'a'ava, a na vilaku a na mai a na vagavaimiga ta na nagoi bei yau a miamiaga 'waineye. 'Ai'edi 'eba mianidi kebu i da 'eno'enoviga, 'ako kebu a da vonemiga. 4 Bei a na nagoga 'akonadi 'wa 'asetai, wata 'ana 'eda 'wa 'asetai.” 5 Tomasi i voneni i vo, 'Auvea, 'ima kebu 'a da 'asetaiga ava'aibe 'u na nago, begaidi 'ana 'eda kebu tamu sai'afo 'a da 'asetai.” 6 Iesu i voneni i vo, Yau 'asa'aiana kumaniku 'eda. Yau nani matatabuna tonovidi lamuna, wata 'aseta mogitana 'ana tove. Yau wata 'waikuyega mia 'ivauna wata 'atumaina i sousouyeni. Kebu tamu wata 'eda i da 'eno'eno bega 'wa na nagoi Tamaku 'waineye, 'eda 'aitamogana, ma yami vetumagana taunimi 'wa na tauyemi 'waikuye. 7 'Ai'edi mogitana 'wa da 'asetakuga, wata bani'odi Tamaku 'wa da 'asetai. Siwe 'asiau wata 'awaie 'akonadi 'wa 'aseta'atumaia wata 'wa 'iseni.”

S1 Ion 14:27S3 Ion 17:24S6 Efe 2:18 Ion 11:25

Iesu Yaubada 'ana labilabina.

8 Filifi i voneni i vo, 'Auvea, nuanuama Tamada 'u na vema, 'asa'aiana kumanina yama nuanua.” 9 Wata Iesu yana tovetutuyamavo i vonedi i vo, 'Omi, yau taiadi tutuya manamanawena ta miamia, siwe Filifi 'wa da vo kebu 'u da 'asetaku. Egavo i 'iseku, 'asa'aiana 'akonadi wata Tamada i 'iseni. Awale 'u vo, Tamada 'u na vema?” 10 Filifi, 'u da vetumagana, yau Tamada 'ana labilabina, wata Tamadanina i labilabiniku. Yaku vona a veifufuyediga 'waimie kebu tauniku yaku nuanuayega, Tamada 'aku labilabina yana folova i 'i'idewadi 'waikuyega. 11 Nuanuaku 'wa na vetumagana 'waikuye, yau Tamada 'ana labilabina wata Tamadanina i labilabiniku. 'Ai'edi vitana 'waimie, 'eba nuavogana wata 'eba nua'ewa a 'idewadiga 'wa na nuanidi nika 'ami fata 'wa na vetumagana 'waikuye. 12 A vona mogitana 'waimie egavo i na vetumaganaga 'waikuye folovanidi bani'odi yau a 'i'idewadiga 'adi fata i na 'idewadi. Siwe wata folova toketokeotogidi wata bwaikaotogidi 'adi fata i na 'i'idewadi fai yau a na nago Tamada 'waineye. 13 Ava'ai naniga nuanuami, 'aku wagavayega Tamada 'waineye 'wa na vevelu'ui, mogitana a na 'i'idewadi. Fai yami nuanua a na 'i'idewadiga, mali tomotoga i na 'iseni Tamada i na subisubiai. 14 Naninidi nuanuami, 'ai'edi 'aku wagavayega 'wa na vevelu'ui 'waikuye, mogitana a na 'i'idewadi.”

S9 Kolos 1:15S10 Ion 12:49S11 Ion 10:38
S12 Mak 16:19-20S13 Mad 7:7 Ion 16:23-24, 15:7

Iesu i vona'awaufaufa 'Anu'anunu 'Atumaina

i na vetunei.

15 Wata Iesu i vo, 'Ai'edi mogitana 'wa na nuakalikalieku yaku veimea 'wa na vevematayakeyakedi. 16 Tamada 'waineye a na velu'ui bega tamu 'ami To'aivaita i na velemi, taiadi 'wa na mia-vagata. 17 To'aivaitanina, taunina 'Anu'anunu 'Atumaina, Yaubada yana nuanua tonovidi i na veve 'waimie. Tomotoganidi fwayafwaya 'ana nuanua 'waidie i vebwaikaga, kebu 'adi fata taunidi i na tauyedi 'Anu'anunu 'Atumaina 'waineye fai kebu i da 'isa'inanai wata kebu i da 'asetaiga. We'e 'omi 'akonadi 'wa 'asetai fai taiadi 'wa miamiani wata 'awaie i na agemi.

18 A na 'iawemi siwe kebu 'wa na vo, 'Ima fovafovama, kebu tamu 'ama to'aivaitaga,” fai a na vilaku a na mai 'waimie. 19 Sai'afoga tomotoganidi fwayafwaya 'ana nuanua 'waidie bwaikina kebu wata i na 'ise'isekuga, we'e 'omi 'wa na 'ise'iseku. Yau a mia-vagata, begaidi 'omi wata 'wa na miamia. 20 Tutuyanina 'Anu'anunu 'Atumaina i na mai, 'wa na 'asetai yau Tamaku 'ana labilabina, wata 'wa na 'asetai yau a labilabinimi wata bani'odi 'omi 'wa labilabiniku.

21 Egavo yaku veimea i 'asetadi wata i vevematayakeyakedi, taunidi 'aku tonuakalikali. Fai i nuakalikalieku, begaidi Tamaku i na nuakalikaliedi. Yau wata a na nuakalikaliedi bega tauniku faifaiku a na lulu'ivona 'waidie.” 22 Tamu Iudasa, kebu Iudasa Isakaliota, i velutoli Iesu 'waineye i vo, 'Auvea, awale taunimu faifaimu 'u na lu'ivona 'waimeye, we'e tomotoganidi fwayafwaya 'ana nuanua bwaikina 'waidie, kebu 'u na lu'ivonaga?” 23 Iesu Iudasa yana vona i tutuli i vo, Egavo i nuakalikalieku mogitana, yaku vona i na vevematayakeyakedi. Tomotoganidi Tamaku i na nuakalikaliedi bega yau wata Tamaku taiadi 'a na mai 'a na lauvila 'waidie. 24 Egavo kebu i da nuakalikaliekuga, taunidi yaku vona kebu i na vematayakeyakedi. Vonanidi a veifufuyedi 'wa nogaidiga kebu tauniku yaku nuanuayega, Tamada 'aku tovetune 'wainega i maia.

25 Bola taiadi ta miamiagana, vonanidi a vonevoneyedi 'waimie. 26 Siwe tutuyanina Tamada 'Anu'anunu 'Atumaina 'aku wagavayega i na vetunei 'waimie, nani matatabuna i na vemi. Fai taunina 'ami To'aivaita, wata 'ami 'Eba Tolinuata'i bega naninidi a voneyediga matatabuna kebu nuami i na fani.

S15 1 Ion 5:3S16 Ion 14:26, 15:26S17 Ion 16:13
S20 Ion 17:21S21 Ion 15:10S23 Ve 3:20S26 Ion 15:26, 16:7

Iesu nuanua bikana mia 'atumaina taiadi i veleveleda.

27 A na 'iawemi siwe a na 'ivaisemi yami nuanua i na bikadi. Tutuya fuedi yaku nuanua bikana, nuanuananina bikana a velevelemi yau tauniku 'waikuyega bega nuami kebu i na vita, kebu 'wa na kololo, wata kebu nuafoumi i na veviga. Mali tomotoga 'adi fata i na 'ivaisemi bega nuami sai'afo i na bikadi, siwe kebu tutuya manamanawenaga i na 'a'ava, we'e nuanua bikana mia 'atumaina taiadi a velevelemiga i na 'eno-vagata 'waimie. 28 'Akonadi 'wa nogai a vonemi a vo, Yau sai'afoga a na 'iawemi, siwe wata a na vilaku a na mai 'waimie.” 'Ai'edi mogitana 'wa da nuakalikalieku, 'ako kebu 'wa da nuavitaga yaku tauya faifaina, 'wa da sososoana fai yau a na nago Tamada 'waineye, taunina i vebwaika-'iaweku. 29 Bola taiadi ta miamiagana a vona-vagasemi yaku tauya faifaina, bega tutuyanina i na souyeni 'wa na 'iseni nika 'wa na vetumagana 'waikuye. 30 Kebu a na veveifufu manamanawena 'waimie fai sai'afoga Seitani i na le'wa. Seitaninina ma yana veimea fwayefwayeye nuanuana i na nikeku siwe yana toketokena 'waikuye nani-'avo'avovo wata kebu tamu sai'afo i na vevitaku sakona faifaina. 31 I lubwaineni tomia fwayafwaya i da 'aseta'atumaia Tamada a nuakalikalieni wata a tauyeku 'waineye bega ava'ai nuanuana i na vonekuga a na 'idewai.” Iesu i vona'a'avana, yana tovetutuyamavo i vonedi i vo, 'Wa tovoi ta na nagoi.”

S27 Ion 16:33 Fil 4:7S28 Luk 24:31-32S30 Ion 12:31